Link açıqlığı

Saatnıñ esas haberi

Qırımda Meclis azasınıñ qızını qoruqtan işten boşattılar


Qırımtatar Milliy Meclisiniñ azası İlmi Ümerovnıñ qızı Ayşe Ümerova Bağçasaray tarihiy-medeniy qoruğından işten boşatıldı. Bunı o Facebook saifesinde yazdı.

Ayşe Ümerovanıñ qayd etkenine köre, emek kitabında onı Rusiye Federatsiyasınıñ Emek kodeksiniñ maddesi boyunca işten boşatqanları yazıla, lâkin ukrain müüri qoyuldı.

«Asılında, eki aydır çalışmayım, bu müddet devamında «qavaltılarnen» aşatqan ediler, bir şeyni beklemege rica etken ediler, lâkin niayet er şey belli oldı, emek kitabını «rf emek kodeksiniñ böyle bir … maddesi boyunca işten boşatıldı» meraqlı bir yazı bar, amma... sür.. ukrain müüri qoyuldı», – dep yazdı o.

Onıñ aytqanına köre, bunıñ sebebi siyaset oldı.

«İşten boşatuvnıñ sebebi, maalesef, bugünki vaziyet içün ğayet adiy – siyaset, siyaset, er yerde siyaset... Ümüt etem ki, Qırımğa yahşı vaqıtlar kelecek, ve seniñ ve qorantanıñ siyasiy baqışları işine tesir etmeycek, «cezalaycaqlar» dep tüşünmeyip, fikir-tüşüncelerini raat-raat bildireceksiñ, soyadına baqmayıp, işine baqacaqlar...», – dep qayd etti Ayşe Ümerova.

2015 senesiniñ başından itibaren Bağçasaray tarihiy-medeniy qoruğınıñ hadimleri işten boşatılğan edi, ilmiy hadim ve gidlerniñ yalıñız bir qısmı keri işke alındı.

Keçken seneniñ dekabr ayında Bağçasaray tarihiy-medeniy qoruğınıñ baş müdiri vazifesinde Elmira Ablâlimova boşatılğan edi. Onıñ aqayı olğan Qırımtatar Milliy Meclisiniñ reis muavini Ahtem Çiygoz bunı siyasetnen bağlağan edi.

XS
SM
MD
LG