Qırımtatar Milliy Meclisiniñ azası İlmi Ümerovnıñ fikirince, yerli akimiyet qırımtatarlarnen dialog qurmaq içün olarnıñ milliy liderleri Mustafa Cemilev ve Refat Çubarovnıñ kiriş yasağınıñ lâğu etilmesi içün elinden kelgenini yapmalı. Bunı o Facebook saifesinde yazdı.
Ümerov qayd ete ki, Qırımtatar Milliy Qurultayınıñ yañı «Qırım» fraktsiyasına yüz delegat kirgeni aqqında haber yalandır.
«Men aytqan edim, daa bir kere aytam: 105 delegat yalandır. Qırımtatarlar ile bağ olmasını isteseler, Liderni, Meclis reisini ve digerlerni Qırımğa alsınlar, uydurılğan cinaiy işlerni qapatsınlar ve apiste qanunsız alda tutulğanlarnı azat etsinler...», – dep yazdı Meclis azası.
Mart 3-te Aqmescitte olıp keçken matbuat konferentsiyasında bir sıra qırımtatar cemaat teşkilâtınıñ vekilleri Qırımtatar Milliy Qurultayında «Qırım» fraktsiyasınıñ meydanğa ketirilmesi aqqında bildirdiler. İşbu fraktsiya erkânına kirgen delegatlar Meclis reisi Refat Çubarovnıñ yerine Qırım spikeriniñ muavini Remzi İlyasovnı saylaycaq olalar.
2014 senesi mayıs 2-de Mustafa Cemilevge 5 yıl devamında işğal etilgen Qırımğa kirmege yasaq etildi, iyül 5-te aynı yasaqnı Qırımtatar Milliy Meclisiniñ reisi Refat Çubarov aldı. Cemilev işbu qararğa Rusiye mahkemelerinde itiraz bildire. 2015 senesi fevral 12-de Moskvanıñ Basman mahkemesi Mustafa Cemilevge Rusiyege ve onıñ tarafından zapt etilgen Qırımğa kirmege izin bermedi.
