Qırımtatar faali Reşat Ametovnıñ öldürüv taqiqatı toqtatıldı.
Bunı elâk olğan faalniñ doğmuş ağası Refat Ametov QHA agentligine bildirdi.
«Men cevap aldım, qatiller tapılmağanından sebep taqiqat toqtatıldı. Qaçırğan insanlar, añlağanıma köre, tapılğan, yaqalanğan, soñra ise azat etilgen edi. Taqiqat devam etecekmi – belli degil», – dedi o.
Soy-sopları cinayet ögrenilecek, qatiller ise ceza alacağına ümüt etken ediler. Şimdi ise, Reşat Ametovnıñ işi «buzlatılğan» soñ olar taqiqat adaletli olacağını tüşünmeyler.
«Men iç bir vaqıt bundan şübelenmegen edim, taqiqat da ketken edi, adamlar tapılğan edi, lâkin Reşatnı qaçırğan adamlar azat etilgen soñ işniñ soñu olacağına inanmayım. Men ise eminim, bu adamlar cezalanacaq, elbet de, daa sağ olsalar», – dep ayttı Refat Ametov.
Reşat Ametov 2014 senesi mart 3-te Qırım Nazirler şurası binasınñ yanında bir özü keçirgen piket vaqtında qaçırılğan edi.
Eki aftadan soñ onıñ cesedi azap izleri ile tapıldı. Böyle etip Qırımda işğalge qarşı çıqqan ve yañı Qırım akimiyetiniñ birinci qurbanı olğan Reşat Ametovnı tanıdılar. Cinaiy iş birden eki devlette açıldı.
Uquq qorçalayıcılar Reşat Ametovnıñ öldürüv taqiqatınıñ semereli olmağanını akimiyet ve uquq qoruyıcı organlarnıñ onı keçirmek istekleri olmağanınen bağlaylar, amma videoda Ametovnı «samooborona» vekilleri tarafından qaçırğanı belli.
