Link açıqlığı

Avropa Birliginiñ tış işler yüksek vekili Federica Mogherini Rusiyeni Nadejda Savçenko, Oleg Sentsov ve qanunsız alda esir alınğan diger Ukraina vatandaşını azat etmege çağırdı.

«Men Rusiye akimiyetini Savçenkonı azat etmege çağırğan adamlarğa reyimni qoşam. Men Oleg Sentsovnı ve Minsk añlaşmalarına köre azat etilecek qanunsız alda esir alınğan diger adamlarnı azat etmege çağıram», – dep qayd etti Mogherini.

Avropa Şurasınıñ nazirler Komiteti, Ukraina Yuqarı Radası, Avropa parlamenti, Ukraina prezidenti Petro Poroşenko ve bir çoq diger halqara müessise ve siyasetçi de Nadejda Savçenkonı azat etmege çağıralar, – dep haber ete Radio Svoboda.

Mart 4-te Rusiyedeki Moskvanıñ Basman mahkemesi ukrain uçucısı Nadejda Savçenkonıñ Avropa Şurası Parlament assambleyasınıñ toplaşuvında iştirak etmek imkân berilmegeninden sebep şikâyetini red etti. Savçenko onıñ Rusiyede qanunsız alda apiste tutuvğa qarşı narazılıq bildirmek maqsadı ile 82 kün devamında açlıq tutmaqta. Savçenkonıñ adliyecileri onıñ sağlığı fenalaşqanını bildireler.

Rusiyede Nadejda Savçenkonı Donbassta elâk olğan Rusiye jurnalistleriniñ ölümine alâqası olğanında qabaatlaylar.

İyünniñ soñunda separatistler onı esir alıp, Rusiye arbiylerine teslim ettiler. Bundan soñra Savçenkonı Rusiyede apiske aldılar. İmayeniñ malümatına köre, onıñ jurnalistlerniñ ölümine alâqası yoq, çünki o, esarette edi. Savçenko bütün qabaatlarnı red ete.

Yanvar ayınıñ soñunda taqiqatçılar Savçenkoğa qarşı sıñırdan qanunsız keçüv aqqında daa bir cinaiy iş açılğanını bildirdiler.

Minsk añlaşmaları bütün esirlerniñ azat etilmesini belgilemekte.

Buña baqmadan, Rusiye Savçenkonı azat etmey.

Bundan ğayrı, Ukrainanıñ daa bir qaç vatandaşı, olarnıñ arasında «terrorizmde» qabaatlanğan Qırım rejissöri Oleg Sentsov, Rusiyede apiste qalalar. Uquqçı ve uquq qorçalayıcılar bunıñ qanunğa riayet etkenini red eteler.

XS
SM
MD
LG