Qırımda «Qırım baari» olaraq adlandırılğan vaqialarnıñ birinci yıllığına bağışlanğan tedbirlerni belgilediler.
Qırım ükümeti tedbirler cedvelini derc ete.
Olarnıñ çoqusı Aqmescitte keçirilecek.
Tedbirlerniñ cedveline binaen, mart 10-da «Qırım poçtası» bir yıl evelsi olıp keçken vaqialarğa bağışlanğan mektüp pulunı azırlaycaq.
Mart 11-de akimiyetniñ işini aydınlatqan Krıminform agentliginiñ matbuat merkezinde «Qırım baari» mevzulı fotoresimler albomını taqdim etecekler.
Mart 12-den 22-ge qadar Devlet akademik muzıkalı teatrinde «Seniñ Qırım baariñ» cumhuriyet fotosergisi keçirilecek.
Mart 16-da, «referendum» keçirilgen künü, Qırım Devlet şurasınıñ meydanında medeniyet tedbirleri keçirilecek, soñra ise parlament binasınıñ foyyesinde «Qırım baari» fotoresimler sergisi açılacaq.
Aynı bu künü yerli saatke köre saat 18:00 Aqmescitteki Lenin meydanında tantanalı tedbir ve bayram kontserti keçirilecek.
Mart 18-de yerli saatke köre saat 09:00 «Birleşüv» aktsiyası ötkerilecek, onıñ çerçivesinde Rusiye Federatsiyası subyektleriniñ devlet binalarında Qırım Cumhuriyetiniñ bayrağı köterilecek.
Bu künü aqşam Aqmescitteki Lenin meydanında tantanalı toplaşuv ve bayram kontserti ötkerilecek.
Beyanatta qayd etile ki, tedbirler Qırım Cumhuriyetiniñ «Anayasası» qabul etilgen künü, aprel 11-de, bitecek. Qırımlılarğa üç devlet tili – rusça, ukraince, qırımtatarca – bastırılğan Qırım Cumhuriyetiniñ Anayasasını dağıtacaqlar.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Ukrainada Qırımdan köçip kelgen adamlarnıñ teşebbüsi ile Qırım işğaline qarşı informatsion kampaniya başlandı. Onıñ çerçivesinde fotosergi, brifing, telemarafon, konferentsiyalarnıñ keçirilmesi planlaştırıla. Qırım işğaliniñ yıllığı ile bağlı tedbirler mart 15-ke qadar devam etecek.
