Link açıqlığı

Ukraina Yuqarı Şurasınıñ deputatı, «Qırım» firqalarara birliginiñ başı Оleksiy Gonçarenko ukrain parlamentiniñ toplaşuvında Rusiyeniñ Qırım işğaliniñ yıllığı aqqında hatırlattı ve yarımada oña şimdi türmeni añdırğanını qayd etti.

«Dünya endi bir yıl devamında üçünci cian cenki bosağasında tura. Bu er şey Qırımımızda QMC Yuqarı Şurası, Nazirler Şurası binasınıñ, Aqmescit ava limanınıñ zaptından başlandı. Yüz bergen adiselerni epimiz hatırlaymız. Bilemiz ki, Putin ve Kreml bugün Qırımdan Alkatras türme adasını yaptı, biñlerce ukrain vatandaşını mabüs ete. Qırım boz zona oldı», – dedi Gonçarenko.

O, qırımtatar halqı aqlarınıñ bozuluvını ve yarımadada olğan çeşit din vekilleriniñ zulumını qayd etti.

«Bugün bütün dünyağa, özümizge ve Ukraina vatandaşlarına Qırım – Ukraina olğanını ve olacağını hatırlatmaq kerekmiz. Qırım üzerinde Ukraina bayrağı yelpirecek», – dedi o.

2014 senesi mart ayında, Qırım işğali başlağanda, Oleksiy Gonçarenko Ay-Petri üzerine Ukraina bayrağını tikledi. Deputatnıñ sözlerine köre, yarımadada «referendum» keçken künü o, saylav bölüklerniñ birine kirip, anda rey bergen Sergey Aksönovnıñ közleri ögünde Ukraina bayrağını açıp qoydı.

XS
SM
MD
LG