Moskva Basman mahkemesi mart 4 künü ukrain arbiy hızmetçisi, Ukraina Yuqarı Şurasınıñ deputatı Nadejda Savçenkonıñ onı Avropa Şurası Parlament assambleya toplaşuvına yollamağan taqiqatqa qarşı itirazını baqacaq.
İmayeniñ fikrine köre, PACE vekili statusı qabaatlanğan şahısqa diplomatik imunitetni ve toplaşuğa barmağa aqnı bere. Adliyeciler şunı deyler ki, Avropa Şurasınıñ iç bir memleket azası buña qarşı çıqamaz.
Beklenilgeni kibi, Savçenkonı mahkeme toplaşuvına ketirirler. Rusiyede Nadejda Savçenkonı Donbassta elâk olğan Rusiye jurnalistleriniñ ölümine alâqası olğanında qabaatlaylar. İyünniñ soñunda separatistler onı esir alıp, Rusiye arbiylerine teslim ettiler. Bundan soñra Savçenkonı Rusiyede apiske aldılar. İmayeniñ malümatına köre, onıñ jurnalistlerniñ ölümine alâqası yoq, çünki o, esarette edi. Savçenko bütün qabaatlarnı red ete.
Yanvar ayınıñ soñunda taqiqatçılar Savçenkoğa qarşı sıñırdan qanunsız keçüv aqqında daa bir cinaiy iş açılğanını bildirdiler.
Nadejda Savçenko 8-inci çağırılış Ukraina halq deputatı, Avropa Şurası Parlament Assambleyasında Yuqarı Radanıñ delegatı olıp, halqara immunitetke saip. Seksen künden ziyade narazılıq açlığını tuta.
