Link açıqlığı

Qırım Devlet Şurasınıñ başı Vladimir Konstantinov şunı bildirdi ki, Qırımtatar Milliy Meclis reisi Refat Çubarov bıltır olğan adiseler vaqtında, «referendumnıñ» arfesinde, «Kiyev tarafından vade etilgen Qırım parlamenti vazifesine keçmek içün faal sürette dubaralta edi».

Böylece, Konstantinov Çubarovnıñ bıltır olğan vaqialar ile bağlı hatırlavlarına seslendi. Çubarov tafsilâtlı şekilde Rusiyege Qırımnı işğal etmege yardım etken Qırım memurları aqqında tarif etti. Qırım spikeri öz hatırlavlarını Facebookta aşkâr ete.

«Şimdi, eger de o (Çubarov – muar.) bunı tanısa edi, o vaqialarda olğan rolüni qaramaniy sürette taqdim etemez edi. Aynı böyle «qaramaniy» tarzda o, Qırım Yuqarı Şurası fevral 26 künü Qırımnıñ Ukrainadan ayırıluvı aqta rey berecegi aqta tarif etip, fevral 25 künü qırımtatar mobilizatsiyasını ilân etkeni aqqında şimdi bir şey aytmay. O vaqıt toplaşuv tertibinde buña oşağan mesele yoq edi ki», – dey Konstantinov.

O şunı bildirdi ki, fevral 25-26 künleri Qırım akimiyeti «cumhuriyet vekâletlerini keñişletip, 1992 senesi statusına qaytıp, yarımadanıñ Kiyevde akimiyetke kelgen «yevroislâatçılarnıñ» areketlerinden havfsızlığını temin etmege arz ete edi» eken.

«Muzakerelerge azır edik, amma bunıñ yerine bizge taba açuvlı insan sürüsini yolladılar», – dey spiker.

O, 2014 senesi fevralniñ 26-da qırımtatarlarnıñ raqiplerinde olğan silâ aqqında malümatnı da red ete.

«O vaqıt iç bir silâ qullanılmağan edi. Meclis boyevikleri ise gaznı kerçekten de qullanğan ediler. Bu da – fakt. Em de gaznıñ qullanılması olarğa teşebbüsni özlerine çekip, parlament binasına kirmege imkân berdi. Çubarov bunı ne içün aytmay? Çünki böyle şeyler onıñ suniy barıştırıcı sıfatını boza», – dey Konstantinov.

Onıñ sözlerine köre, fevral 27-28 künleri vaziyet kergin olıp qala edi. Konstantinovnıñ aytqanı kibi, «hunta tarafına keçken küçler er zaman binağa ücüm ete bile edi». Faqat mart 1 künü Aqmescit merkezi Rusiye ordularınıñ nezaretine keçti.

«Çubarov öz devlet avdarılması planınıñ muvafaqiyetsiz olğanından qasevet çekip, bütün detallerni unutqandır, ğaliba. Şunıñ içün onıñ bıltır olğan adiselerniñ aksi şimdi yañlıştır…», – denile Konstantinovnıñ beyanatında.

Evel Refat Çubarov Qırım.Aqiqatqa bergen izaatında aytqanı kibi, yarımada işğali arfesinde qırımtatarlarnı Qırım vaziyetini patlata bilecek areketlerge celp ete ediler.

Fevral 27 künü saat 4:20 belgisiz silâlı insanlar tarafından Qırımnıñ Yuqarı Şurası ve Nazirler Şurasınıñ zaptı başlandı. Saba Aqmescit sakinleri ükümet binaları üzerinde Rusiye bayraqlarını kördiler. Prokuratura zaptnı terroristik areket olaraq tanıdı. Qırım parlamentiniñ nevbetten tış toplaşuvı avtomatlar altında keçti. Birazdan muhtariyetniñ statusı aqqında referendumnı keçirmege qarar alına.

Aprel 17 künü Rusiye prezidenti Qırımda bulunğan silâlı insanlarnıñ Rusiye arbiyleri olğanını tanıdı.

XS
SM
MD
LG