Ukraina Yuqarı Şurası deputatı, qırımtatarlarnıñ milliy yetekçisi Mustafa Cemilevniñ öldürüvde qabaatlanğan oğlunıñ imayesi işniñ Krasnodardan Qırımğa qaytarılmasını talap etecek.
Bunı TASS agentligine Hayser Cemilevniñ adliyecisi Nikolаy Polozov bildirdi.
Polozov şunı da qayd etti ki, imaye bunı yarımadada Yuqarı mahkemeniñ teşkil etilmesinden evel de talap ete edi.
«Rusiye Yuqarı mahkemesiniñ çıqarğan qararlarınıñ kopiyalarını elde ettik. Ve şimdi itiraz bildirmege bizge bir şey keder etmey. Eger de Yuqarı mahkeme meseleni prezidiumğa berse, iş baqıluvı Qırımğa avuştırıla bilecek», – dedi Polozov.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
