Qırımtatarlarnıñ çoqusı ve Meclisniñ şimdiki terkibi akimiyet ile dialognı qurmağa azır, buña Meclisniñ terkibini formatlamaq ve yañı yetekçilerni qıdırmağa kerekmey, dep tüşüne Qırımtatar Milliy Meclis reisi Nariman Celâl.
Bunı Meclisniñ matbuat hızmeti bildire.
«Akimiyetke begenilmek içün bizge printsiplerimizige ve milliy idare organlarnıñ faaliyeti aqqında qaidelerge qarşı çıqmağa teklif etile. Faqat Qurultay ve Meclis bir kimsege begenilmek içün degil de, qırımtatar halqınıñ aq ve menfaatını qorçalamaq içün teşkil etildi», – dedi Celâl.
Meclis reis muavini qırımtatarlar ile bağlı muayyen meselelerniñ al etilmesi içün akimiyetnen dialognıñ olmasını mümkün ve zaruriy saya, şu cümleden «havfsızlıq meseleleri, aq-uquqlarınıñ qorçalavı, siyasiy taqipniñ toqtatıluvı, Qırımğa kirişleri yasaqlanğan insanlarnıñ qaytıp kelmesi, tasil, avdet, topraq, medeniyet inkişafı, milliy matbuat vastalarınıñ faaliyeti, din meseleleri ve ilâhre».
«Qırımtatar Milliy Meclisi ve Qurultayı uquqsız vaziyette bulunğanı aqta aqiqiy malümatnı bermek yerinde, yani Meclisniñ bir qısmı, şu cümleden reisi de, iradesi qarşı Qırım tışında buluna, reis muavinlerinden biri apiste qapalı olğanda, bizge «formatlaşıp», halqara uquqta tanılğan insan aqları ve qırımtatar halqınıñ Qırım tamır halqı olaraq er taraflama inkişafı, bar olmasına lâzim kollektiv uquqlardan faydalanmaq imkâniyetten göñülli sürette vazgeçmege teklif eteler», – dedi Celâl.
«İslâatçılarnıñ» ayneciligi şundan ibaret ki, olar añlı sürette qırımtatarlarnı Tamır halqlar aqqında Beyannamede añılğan esas aqqından marum qaldıracaq olalar, yani, – «olarnıñ aqları ile bağlı meselelerniñ çezilmesinde saylanılğan temsilciler yardımı ile iştirak etmek ve şahsiy direktiv müessiselerni saqlamaq», – dep qoştı o.
Salı künü, mart 3-de, qırımtatar cemaaat teşkilâtlarınıñ bir qısmı Aqmescitte keçirilgen matbuat konferentsiyasında Qırımtatar Milliy Qurultayında «Qırım» firqasınıñ teşkil etilmesi aqqında bildirdiler. İşbu firqağa kirgen vekiller Meclis reisi Refat Çubarovnı Qırım spiker muavini, Mecliste azalığı toqtatılğan Remzi İlyasovğa deñiştirecek olalar.
