Qırımtatar cemaat teşkilâtlarınıñ temsilcileri Qırımtatar Milliy Qurultayında «Qırım» firqasını teşkil etip, ileride Meclis reisi Refat Çubarovnı deñişterecek olalar.
Bunı mart 3 künü keçirilgen matbuat konferentsiyasında «Qırım» qırımtatar halqınıñ cemiyet areketiniñ kâtibiyet reberi Murat Yazıcıyev bildirdi, haber ete Qırım.Aqiqat mühbiri.
Onıñ sözlerine köre, firqağa Qurultaynıñ 248 vekilinden 105 insan kirdi, olardan çoqusı – «Qırım» areketiniñ faalleri.
«Şimdi toqtamaycaqmız. Kelecekte firqanı keñişletirecekmiz», – dedi Yazıciyev.
Bundan da ğayrı, firqa vekilleri aprel-mayısta Qırımtatar Milliy Qurultayınıñ nevbetten tış toplaşuvını keçirip, Meclis ve onıñ reisi Refat Çubarovnıñ faaliyetine qıymet kesecek olalar.
«Qurultay vekilleri toplaşıp, bugünki künde buzlatılağan Meclis faaliyetine qıymet kesmeli. Meclisniñ bazı azaları bugünde-bugün aselet işni soza. Toplaşuvlar ise qıtadan skyp vastası ile keçirile. Bizim içün maqbül degil bir şey. Bizimce, yetekçi öz halqı ile olmalı», – dedi yañı teşkil olunğan firqağa kirgen Qurultay vekili Refat Derdarov.
O şunı da hatırlattı ki, kvorum içün Qurultay vekilleriniñ üçte eki qısmı olmalı. Şimdi faaller diger vekiller ile muzakerelerni keçireler. Ümüt etemiz ki, olar bizni añlap, bizim tarafımıznı alarlar. Em Qurultay, em Meclisni saqlamaq isteymiz. Vaqıt kelgende, reisni deñiştirmek. Misal içün, milliy areket yetekçisi yerinde Remzi İlyasovnı köremiz ve onıñ namzetini telkif etecekmiz», – dedi Derdarov.
Yaqında, Mecliste temsilciligi toqtatılğan Qırım parlamentiniñ spiker muavini Remzi İlyasov martnıñ ekinci qısmında «Qırım» firqasınıñ teşkil etilecegi ve Qırımtatar Milliy Qurultayınıñ toplaşuvı olacağı aqqında bildirdi. O şunı bildirdi ki, sanki endi yüz vekil milliy toplaşuvnı çağırmağa razı olğan eken.
Qırımtatar Milliy Meclis azası İlmi Ümerov bu malümatnı «yalan» olaraq adladı.
