Link açıqlığı

Ukrainlilerniñ aman-aman 70% Rusiye tarafından işğal etilgen Qırımnı Ukraina devletiniñ toprağı olaraq saya.

Bunı «Demokratik teşebbüsler» Fondunıñ müdiri İrina Bekeşkina Kiyevde keçirilgen tögerek masa devamında bildirdi, dep haber ete Ukrinform.

«Qırımnı Rusiye toprağı olaraq vatandaşlarnıñ yalıñız 14% tanıy. Bunıñ ile şunı qayd etmek isteyim ki, olardan yalıñız 8% Qırım qanuniy sürette işğal etildi dep tüşüne», – dedi Bekeşkina.

Onıñ sözlerine köre, bu şunı tasdiqaly ki, Qırım Rusiye Federatsiyasınıñ territoriyası olğanı aqta fikir cemiyette keñ tarqatılğanı ile bağlı malümat yañlıştır.

O şunı da qayd etti ki, soravdan keçken er onuncı insan Qırımnı ne Ukraina, ne Rusiyege ait olğan topraq olaraq tanıy, daa 8% öz mevamını bildirip olamadı.

İçtimaiy sorav yanvar ayından Ukrainanıñ 11 regionında, Lugansk vilâyeti ve Qırımdan ğayrı, 4413 insan arasında keçirildi.

2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG