Krasnodar ülkesiniñ mahkemesinde mart 3-te Ukraina halq deputatı, qırımtatarlarnıñ milliy lideri Mustafa Cemilevniñ öldürüvde qabaatlanğan oğlu Hayserniñ işi boyunca ilk diñlev ötkerilecek.
Bunı RİA Novosti bildire.
Neşirniñ malümatına köre, ilk diñlev Hayser Cemilevniñ imayesiniñ ricası ile ötkerilecek. Bundan ğayrı, bugün işniñ prokuraturağa qaytarılması da baqılacaq.
Fevral 24-te Krasnodar ülkesiniñ mahkemesi Hayser Cemilevniñ cinaiy işini umumiy tarzda baqılmasını toqtattı. Bu işni mahkemeci olmağanlar baqacaq.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
