Ukraina mudafaa imkânlarını quvetleştirmek ve Rusiyege qarşı cezalarnıñ quvetleştirilmesi üzerinde çalışmaq kerek, – dep ayttı Ukraina prezidentiniñ qırımtatar halqı işlerinden vekâletlisi, Ukraina halq deputatı Mustafa Cemilev. Bu aqqında malümat Petro Poroşenko Blokunıñ resmiy saytında berilmekte.
«Bizler cezalar meselesine büyük ümüt besleymiz, çünki Rusiyeni istilâiy siyasetten vazgeçmege ve yapılğan istilâiy adımlardan vazgeçmege mecbur etecek şaraitler olmalı – yani halqara yaramaz degil de, yahşı bir devlet olması içün er şey yapılmalı. Bunıñ içün ğayet ciddiy cezalar kerek», – dep ayttı halq deputatı UNN neşirine.
Bundan ğayrı, qırımtatar halqınıñ lideri qayd etti ki, Ukraina Rusiyege qarşılıq köstermek içün kendi mudafaa imkânlarını quvetleştirmek kerek.
«Ukraina mudafaa imkânlarını quvetleştirmek ve iqtisadiyatnı sağlamlaştırmaq kerek», – dedi Cemilev.
Onıñ bildirgenine köre, 2014 senesi fevral ayında Ukrainanıñ mudafaa imkânları şimdi olğanı qadar olsa edi, keçken seneniñ vaqiaları başqaca olması mümkün edi.
