Ukraina şarqındaki zıddiyet devamında altı biñ kişi elâk oldı, 15 biñ insan yaralandı.
Bu malümatlar bazarertesi künü Birleşken Milletler Teşkilâtınıñ İnsan aqları idaresiniñ maruzasında berile.
Teşkilât qayd ete ki, qurbanlarnıñ sayısı daa çoq ola bile, çünki BMT elâk olğanlar aqqında tam malümat alamay.
Keçken gece separatistler Donbassta ATO noqtalarına 32 kere ateş açtılar. Ukraina ordusı Donetsk vilâyetiniñ Peski qasabası ve Avdeyevka şeerinde uruşlar devam etkenini bildire. Taraflarnıñ zararları aqqında malümat yoq. «İnformatsion qarşılıq» gruppasınıñ reberi Dmıtro Tımçuk bildire ki, separatistler Mariupol civarındaki Novoazovsqa silânı çekeler. Bundan evel separatistler ağır silânı çekkenlerini bildirgen ediler. OSCE nezaretçileri tehnikanıñ yalıñız altı kolonnası çekilgenini tasdıqladı.
