Rusiye uquq qoruyıcılarınıñ Ukraina halq deputatı, «Qırım» fraktsiyalarara birleşmesiniñ yolbaşçısı Aleksey Gonçarenkoğa iddiaları yoq, şunıñ içün mart 2-ge planlaştırılğan mahkeme olmaycaq.
Bunı adliyeciler Nikolay Polozov ve Mark Feygin bildirdiler.
«Yuqarı Rada deputatı Aleksey Gonçarenkonıñ mahkemesi olmaycaq. İçki işler nazirliginiñ oña iddiaları yoq. Taqiqat komitetinden Markin afu soramaq kerek», – dep yazdı Polozov Twitterde.
Aynısını diger adliyeci Mark Feygin de bildirdi.
Aleksey Gonçarenkonı mart 1-de Rusiye muhalifetçisi Boris Nemtsovnıñ hatırası keçirilgen yürüşte politsiyağa boysunmağanından sebep yaqaladılar. Rusiyeniñ taqiqat komiteti bildirdi ki, Gonçarenkonı «2014 senesi mayıs 2-de Odessada facialı vaqialar vaqtında Rusiye Federatsiyası vatandaşlarını öldürmek ve çekiştirmek ıntıluvları aqqında» iş boyunca sorğuğa çekeler.
Mart 2-de Moskva saatine köre saat 15:00 onıñ «politsiya hadimlerine boysunmağanı aqqında memuriy bozuvnı» muzakere etmek içün mahkeme keçirilecek edi.
