Bazar künü ukrain sıñırcıları memleketke 7 Rusiye vatandaşını kirsetmediler, çünki olar sıñırdan keçüv yañı qaidelerine riayet etmediler.
Bunı Devlet sıñır hızmetiniñ saytı bildire.
«Rusiyeniñ beş vatandaşı sıñırcılarnıñ Harkov taqımı, biri Odessa ava limanında ve daa bir kişi Çernigov sıñır taqımı tarafından toqtatıldı. Olarnı Ukrainağa kirsetmediler», – dep bildirdi matbuat hızmeti.
«Devlet sıñır hızmeti daa bir kere bildire, mart 1-den itibaren Rusiye Federatsiyasınıñ vatandaşları Ukraina sıñırından çetel pasportlar ile keçe bileler, 14 yaşını toldurmağan balalar ana-babasınıñ pasportında qayd etilmeli ya da çetel pasport ile olmalılar. Mart 1-den evel Ukrainağa kirgen Rusiye vatandaşarı memlekette 90 kün devamında içki pasport ile buluna bileler, balalarnıñ ise doğuv şeadetnamesi olmalı», – dep añlattı sıñır hızmeti.
Matbuat hızmetiniñ malümatına köre, sıñırdan keçüv qaideleri deñişse de, kiriş noqtalarında vaziyet tınçtır, bir de bir qavğa olmadı.
