Link açıqlığı

Qırımtatar Milliy Meclisiniñ reisi Refat Çubarov öldürilgen Rusiye muhalifetçisi Boris Nemtsovnıñ hatırasına mart 1-de Moskvada keçirilgen yürüşte iştirak etip olamağanına ve Rusiyege 5 yıllıq kiriş yasağından sebep onıñnen vedalaşıp olamaycağına yazıqsına.

«Dünya kerçek bir Vatandaş ve Küreşçini ğayıp etti!.. Menim mart 3-te de Moskvada Boris Nemtsov ile vedalaşuv merasiminde başımnı egmek imkânım olmaycaq. Dostunı coymaq zor, lâkin Rusiye cemiyetini büyük bir çılğınlıq qaplap alğanda qırımtatar halqını qoruğan, Qırım işğali ve Putin tarafından Ukrainağa qarşı başlatılğan cenkke qarşı çıqqan adamğa temenna etmemek daa zordır», – dep yazdı Çubarov Facebookta.

Meclis reisi Rusiyeniñ yarımada işğaliniñ yıllığı ve bir çoq qırımtatarını vatanında yaşamaq aqqından marum qaldırğan rejim aqqında hatırlattı.

«İşğal etilgen Qırımda bulunğan bütün insanlarnıñ serbestligi ve kelecekke olğan ümütleri alındı. Ahtem Çiygoz kibi eñ cesür insanlar FSB apishanelerine qapatıldı. Boris Nemtsovğa açılğan dört ateş onıñ 87 yaşındaki anası – Dina Yakovlevna Eydmanğa da – açılğan edi. Belki de, sağ ya da ölü qatilniñ adı belli olacaq. Lâkin medeniy dünya biñlernen, on ve yüz biñlernen analarnıñ olarnıñ qız ve oğullarını sağ qaldırmaq içün seyyaremizni er şeyni yoq etken cenkke qaplağan Kreml delisini toqtatmaq kerek», – dep qayd etti Çubarov.

Boris Nemtsov fevral 27-de aqşam Moskvanıñ merkezinde atıp öldürildi. Cinaiy iş açıldı. Ukraina, Amerika Qoşma Ştatları ve Avropa Birliginiñ liderleri olıp keçken adiseden sebep qasevetlenip, cinayetçiler cezasını alacaqlar, dep ümüt eteler.

Rusiye memleketine, şu cümleden Qırımğa kirişini, qırımtatar halqınıñ milliy liderleri Refat Çubarov ve Mustafa Cemilevge, em de bir sıra qırımtatar faal ve uquq qorçalayıcılarına yasaq etti.

XS
SM
MD
LG