Cumaertesi künü, fevral 28-de, Rusiye Federatsiyasınıñ Ankaradaki elçihanesi yanında Türkiyedeki qırımtatarlar diasporasınıñ piketi ötkerildi. Aktsiyada Ukraina vatandaşları – Qırım sakinleri de iştirak ettiler.
Tedbir Rusiyeniñ Qırım işğaliniñ yıllığına bağışlandı.
Qırım.Aqiqatnıñ mühbiri bildire ki, teşkilâtçılarnıñ malümatına köre, aktsiyada aman-aman 1500 kişi iştirak etti.
Toplaşqanlar «Putin, Qırımdan def ol», «Qırımtatarlar teslim olmaycaq», «Qırım oğlu Mustafa, halqıñ seniñ yanında», «Millet. Vatan. Qırım» kibi şiarlarnı seslendirdiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Bundan soñra Amerika Qoşma Ştatları ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını aytmağa devam ete.
