Rusiye prezidenti Vladimir Putin Rusiye muhalifet siyasetçisi Boris Nemtsovnıñ öldürüvini takbih etip, onı provokatsiya olaraq adladı, dep bildirdi Kremlniñ matbuat kâtibi Dmitriy Peskov, haber ete Radio Svoboda.
«Putin qayd etti ki, bu deşetli öldürüv sımarışqa oşay ve provokatsiya ola bile. Devlet yolbaşçısı Rusiye Taqiqat komiteti, İçki işler nazirligi ve Federal havfsızlıq hızmetiniñ reberlerine taqiqat gruppasını şekillendirip, cinayet taqiqatınıñ ketişatını şahsiy nezaret altında tutmağa avale etti. Rusiye prezidenti Boris Nemtsovnıñ soy-sop ve tuvğanlarına teren taziyeler bildire», – dedi Peskov.
Boris Nemtsovnı Moskvanıñ merkezinde fevral 27-de aqşam öldürdiler. Şaatlarnıñ aytqanına köre, eñ azından dört kere ateş açıldı. Nemtsov vaqia yerinde can berdi.
Öldürüv vaqtında Nemtsov bir qıznen kete edi. Rusiye İçki işler nazirliginiñ malümatına köre, o, Ukrainadan keldi.
Rusiye kütleviy haber vastalarınıñ malümatına köre, Moskvada «Tutuv» planı ilân etildi. Cinayet yerinde taqiqat-operativ gruppa çalışmaqta.
