Link açıqlığı

Alim Aliyev: Qırımlılar avtoritar maşinağa rastkelip, yardımnı is etmeyler


Lviv sakinleriniñ qırımlılar içün yazğan video muracaatınıñ maqsadı bir yıldan ziyade avtoritar devletniñ akimiyeti altında yaşağan işğal etilgen yarımada sakinlerine maneviy yardım köstermektir.

Bunı «Krım SOS» cemaat teşkilâtınıñ esasçılarından biri Alim Aliyev Qırım.Aqiqat mühbirine bildirdi.

«Olar avtoritar maşinağa rastkelip, ne Ukraina, ne de halqara teşkilâtlarnıñ yardımını is eteler», ‒ dep ayttı faal.

Aliyevniñ bildirgenine köre, bu levha qırımlılarğa «olarnı yalıñız unutmağanımıznı degil, olarnen beraber olmaq içün elinden kelgenini yapqanımıznı hatırlatmaq kerek».

«Krım SOS» tesisçisi dey ki, devlet cenk mevzusına diqqat etip, Qırımnı unuta. «Bu «telükelidir, çünki Qırım meselesi ve Donbass meselesi ‒ aynı meseledir. Ve Ukraina cenki Qırımdan başlağanı kibi Qırım ile bitmek kerek», ‒ eminliknen ayta Aliyev.

Levha müellifleri qırımlılardan cevap beklemeyler. «Bunıñ kibi levhanı Ukrainanıñ diger şeerleri de çıqarmaq kerekler. Çünki Qırımda qalğanlar yardımğa muhtaclar», ‒ dep qayd etti faal.

Aliyevniñ qayd etkenine köre, Lviv sakinleri videoda iştirak etmekten vazgeçmediler.

«Krım SOS» cemaat teşkilâtı «Lvovdaki Qırım evi» qırımtatar medeniyet merkezi ile beraber Qırım işğaliniñ yıllığı munasebitenen Lviv sakinleriniñ qırımlılar içün «Biz mıtlaqa beraber olacaqmız» adlı video muracaatını çıqardılar.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

Ukrainada Qırımdan köçip kelgen adamlarnıñ teşebbüsi ile Qırım işğaline qarşı informatsion kampaniya başlandı. Onıñ çerçivesinde fotosergi, brifing, telemarafon, konferentsiyalarnıñ keçirilmesi planlaştırıla. Qırım işğaliniñ yıllığı ile bağlı tedbirler mart 15-ke qadar devam etecek.

XS
SM
MD
LG