Link açıqlığı

Qırımnı unutmamaq. İşğal yıllığı qıtadaki cemaatçılıqnı birleştirdi


İnformatsion kampaniyanıñ logosı

Kiyev – Kiyevde ferval 23 – mart 17 künleri arasında Qırım işğali yıllığına bağışlanğan bir sıra tedbirlerniñ keçirilmesi planlaştırıla. «Qırım – Ukrainadır. Er alda» informatsion kampaniyasınıñ teşkil etilüvinde uquq qoruyıcı ve cemaat teşkilâtları, ekspert merkezleri, ukrain devlet organları ve halqara birlikleriniñ vekilleri iştirak etti. Kampaniya teşebbüsçileriniñ sözlerine köre, maqsatları – ukrain akimiyeti ve cemiyetine Qırım faciasını hatırlatmaq ve er kesni işğal etilgen cumhuriyetni qaytaruv meselesi üzerinde birleştrmektir.

«Aqyarda Rusiye tarafdarlarınıñ birinci mitingi keçken fevral 23 kününden başlap ğayet çoq vaqia yüz berdi. Bazıları qırımlılarnıñ işğalge qarşılığını, digerleri – Rusiye Federatsiyası tarafından istilâiy areketlerni köstere ediler. Şunı hatırlatmaq isteymiz ki, Qırım – Ukraina qısmıdır ve daima öyle olacaq», – dedi İnsan aqları aqta malümat merkeziniñ başı Tatyana Peçonçik brifingde çıqışta bulunıp.

Onıñ sözlerine köre, fevral 23 künü başlanğan «Qırım – Ukrainadır. Er alda» kampaniyası yarımadanıñ Ukraina terkibine yalıñız de-yüre degil de, de-fakto qaytacaq kününi yaqınlaştırmaq içün keçirile. Peçonçik şunı da qayd etti ki, teşebbüsniñ teşkilâtçıları vatandaşlıq cemiyetiniñ vekilleri olalar – ekspert ve faaller, amma buña memurlar, deputatlar ve matbuat vastalarınıñ qoşulacağını da bekleyler.

Qırımdan köçip kelgenleriñ Rusiye elçihanesi yanındaki numayışı
Qırımdan köçip kelgenleriñ Rusiye elçihanesi yanındaki numayışı

İnformatsion kampaniya fevral 23 künü başlandı. Rusiye elçihanesi yanında «Rusiye istilâcı» mevzusında fotosergi keçirildi. Mında Rusiyeniñ arbiy istilâsını isbatlağan fotoresimler kösterile edi. İçtimaiy ağlarda «Qırım – Ukrainadır» twitter-aktsiyası başlandı. Teşkilâtçılar qullanıcılarğa saifelerinde #CrimeaisUkraine tegi ile yazılarnı qaldırmağa teklif ete ediler.

«Biz toprağımıznı küç ile qaytarmacaqmız»​

Kampaniya logosını «Zeitgest Design» agentliginiñ art-meneceri Vladimir Kadıgrob işlep çıqardı.

«Müsbet bir şeyni yapıp, ukrainliler toprağımıznı küç ile qaytarmacağını köstermege tırıştıq. Qırımnı, Qırım halqını sevgenimizni köstermege isteymiz ve Qırım ilk evelâ insanlarğa ait: qırımtatarlarğa, ukrainlilerge, rusiyelilerge, ermenilerge…», – dedi dizayner.

Kadıgrob leyhanıñ şiarı – «Qırım – Ukrainadır. Er alda!» sözleriniñ manasını añlattı. Onıñ sözlerine köre, şiar Qırımnıñ Ukrainağa ait olğanı şübesiz olğanını köstere ve Rusiye akimiyeti ile bu aqta davalaşmağa acet olmağanını belgiley.

Fevral 24 künü keçken brifing devamında leyha iştirakçileri ukrain matbuat vastalarınıñ reberlerine «Qırım – Ukrainadır» logosını öz resurslarında yerleştirmege teklif ettiler.

«Ukrain evi» teşkilâtınıñ reberi faali Andriy Şçekun aytqanı kibi, teşkilâtı informatsion kampaniya devamında Ukrainanıñ çeşit akimiyet organlarınıñ iştiragi ile munaqaşalarnı keçirmege planlaştırğanı aqqında bildirdi. Şu cümleden, mart 10 künü Ukraina nazirler Kabinetinde tögerek masa keçirilecektir.

Rusiye elçihanesi yanında köçip kelgenlerniñ narazılıq numayışı
Rusiye elçihanesi yanında köçip kelgenlerniñ narazılıq numayışı

«Bugün mürekkep bir sual bar. Nazirler Kabinetiniñ 2014 senesi iyül 17 künü alınğan QMC ve Aqyar meseleleri boyunca Devlet hızmetiniñ teşkil etilmesi aqta qararı bar. Teessüf ki, işbu hızmet endi yedinci ay teşkil etilmey, faqat devlet bücetinde buña para ayırılğan. Bu mesele kampaniya çerçivesinde muzakere etilecek», – dedi faali.

Bunıñ ile, Şçekunnıñ aytqanı kibi, levha devamında «Qırım» firqalarara birliginiñ Ukraina Yuqarı Şurası deputatları ile umumiy tedbirler keçirilecek. Misal içün, aprel ayına Qırım boyunca parlament toplaşuvlarınıñ keçirilmesi planlaştırıla.

İnformatsion kampaniya keçirilmesine Krım-SOS cemaat teşebbüsiniñ iştirakçileri de qoşuldı. Teşkilâtnıñ koordinatorı Tamila Taşeva yarımada işğali matbuat vastaları ve ukrain siyasetinde ekinci yerge avuştı.

Tamila Taşeva
Tamila Taşeva

«Biz Qırımda ilân etilmegen cenkni köremiz, yüzlernen faaller ğayıp ola. Faallerniñ evlerinde tintüv keçe, bazıları azap izleri ile tapıla, ölümleri boyunca taqiqat areketleri keçirilmey», – dedi Taşeva.

Faalniñ fikrine köre, qıtaiy Ukrainada informatsion kampaniya keçirilmesi işğalni alğışlamağan qırımlılarğa Ukraina devleti tarafından destek numayışı olur.

«Qırım – Ukrainadır» logosı er bir telekanalda

Cemaatçılar tarafından teşebbüs etilgen leyhağa Ukraina prezidentiniñ qırımtatar halqınıñ işlerinden vekâletlisi Mustafa Cemilev qol tuttı. Kampaniya çerçivesinde qırımtatarlarnıñ milliy yetekçisi mart 16 künü Şevçenko adına Kiyev milliy universitetiniñ studentleri ile körüşüvni keçirecek ola, fevral 26 künü Ukrain buhran media-merkezinde ötkerilgen muzakerelerde iştirak etti.

«Qol tutsınlar dep, bütün devlet organlarına mektüp yolladıq. Ümüt etemiz ki, telekanallarda leyha logosını körermiz», – dep bildirdi Vekâletliniñ ofisi apparatınıñ reberi Arsen Jumadilov.

Kampaniya logosınıñ ukrain variantı
Kampaniya logosınıñ ukrain variantı

​«Qırım – Ukraina» kampaniyasında tek ukrain teşkilâtları ve institutları degil de, halqara strukturalar da iştirak ete. Şu cümleden, leyhağa Birleşken Milletler Teşkilâtınıñ İnkişaf Programması da qol tuttı.

«Yıl evelsi BMT inkişaf programması insan aqları ve uquq qoruyıcı faaliyetiniñ nezaret teşebbüsine yönelgen cemaat teşkilâtlarınıñ destegi aqqında ilân etti. Bu saada olğan bir yılılq faaliyet qıtaiy ve Qırım teşkilâtları arasında bağnıñ quvetleştirüvini kösterdi. Kampaniyanıñ başlanuvı buña delil ola», – dedi BMT inkişaf programmasınıñ temsilcisi Vasiliy Romanük.

«Qırım – Ukrainadır» kampaniyası çerçivesinde cumaertesi künü, fevralniñ 28-de, qırımlılarğa qol tutuv numayışı keçirilecek.

XS
SM
MD
LG