Qırım Yuqarı Mahkemesi Qırımtatar Milliy Meclis reis muavini Ahtem Çiygoznıñ tevqifine itiraznı qabul etmedi ve Aqmescit Kiyev rayon mahkemesiniñ fevral 11 künü alğan qararını lâğu etmedi. Çiygoz mayıs 19-na qadar apiste bulunacaq.
Bunı Qırım.Aqiqat mühbirine Qırımtatar Milliy Meclis reisiniñ muavini Nariman Celâl bildirdi.
Onıñ aytqanı kibi, Çiygoznıñ özü mahkeme toplaşuvında bulunmay edi.
«Onıñ özü sağlığı sebebinden mahkeme toplaşuvında bulunmamaq içün ariza yazdı», – dey Celâl.
O şunı da qayd etti ki, Meclis alâ daa Ahtem Çiygoz ve digerlerge nisbeten olğan qabaatnı saçmalıq olaraq tanıy ve olarnıñ azat etilmesini talap ete.
«Şimdi çeşit usullar qıdırıla, informatsion kampaniyadan başlap, halqara devlet tertibatlarına muracaatta bulunmaq kibi», – dedi Celâl.
Ahtem Çiygoznı yanvar 29 künü «kütleviy nizamsızlıqnı teşkil etüvde» şeklep, oña 2015 senesi fevral 19-na qadar, soñra mayıs 19-na qadar apis müddetini belgilediler.
«Fevral 26 künü» işi çerçivesinde uquq qoruyıcılar mitingniñ daa bir iştirakçisi Eskender Kantemirovnı da yaqaladılar. Oña eki aylıq apis cezası belgilendi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
