Cumaaqşamı künü, fevral 26-da, Aqmescitte Kiyevskaya 124 soqağı boyunca turaq-qavehaneni devirdiler.
Aqmescit memuriyetiniñ başı Gennadiy Baharev aytqanı kibi, bir 500 inşaat daa bozulmalı.
«Şusı müim ki, insanlar bizde, Ukrainada olğanı kibi, reklama ve ticariy noqtalarınıñ yerleştirüvi boyunca nizamsızlıq olmaycağını añlamalı», – dedi o.
Aqmescit sakinleri bu kibi areketlerge menfiy sürette davrana.
«Adiy bir keçici olaraq bu areketniñ qanuniy ya da qanunsız olğanını aytamam, amma yaqında qurulğan inşaatnıñ şimdiki bozuluvını begenmeyim. Menimce, o qadar zengin degilmiz ki, qurmaq ve birden yıqmaq içün, bir şeyge yaramaz», – dep tarif etti Qırım.Aqiqatqa paytahtnıñ sakini Valentin.
Fevral 24 kününden Aqmescitte tış reklama obyektlerini mecburiy sürette yoq eteler.
