Qırımda milletlerara munasebetler kerginleşe bile, Taqiqat komiteti buña yol bermemek kerek, dep ayttı Rusiye prezidentiniñ memuriyet yolbaşçısı Sergey İvanov Rusiyeniñ Taqiqat komiteti kollegiyasınıñ toplaşuvında.
«Üküm sürgen vaziyetni köz ögüne alsaq, Qırımda milletlerara munasebetlerni kerginleştirmek ıntıluvlarına diqqat etmege rica etem. Siziñ vazifeñiz – bunıñ kibi areketlerge yol bermemek, bunıñ kibi cinayetlerni acele ve keyfiyetli sürette taqiq etmek, cinayetçilerni tapmaq – teşkilâtçılar ve sımar etkenlerden başlap iştirakçiler ve yardımcılarğa qadar», – dep tekrarlay İvanovnıñ aytqanlarını Rusiye kütleviy haber vastaları.
Qırım akimiyeti Qırımtatar Milliy Meclisini milletlerara dava çıqarmaq ıntıluvlarında bir qaç kere qabaatlağan edi, Nazirler şurası qırımtatarlarnıñ liderleri Mustafa Cemilev ve Refat Çubarovnıñ Qırımğa kiriş yasaqlarınıñ bunıñnen bağlı olğanını bildirgen edi.
