Qırımtatarlarnıñ milliy lideri Mustafa Cemilevniñ fikirince, keçken sene Qırımnıñ işğali başlağanda qırımtatarlarnıñ Rusiyege qoltutqan küçlerge qarşılıq köstermek imkânları yoq edi.
Bunı o Qırım işğaliniñ yıllığı munasebeti ile «5 kanal» telekanalına bergen intervyüsında bildirdi.
«Şimdi ne sebepten qırımtatarlar silâlı qarşılıq köstermediler sualini sıq-sıq bereler. Birinciden, qırımtatar milliy areketi bir qaç on yıl devamında zorbalıqsız, qansız areket etmekte. Şunıñ içün silâlı qarşılıq aqqında laf bile ketmey, olarnıñ silâsı bile yoq edi», – dep ayttı Cemilev.
«Semetdeşlerimizni silâlı qarşılıqqa çağırmaq – barıp ölmek çağıruvına teñ kele edi, çünki ilk evelâ qırımtatarlarnı yoq etmege başlar ediler», – dedi o.
Cemilevniñ qayd etkenine köre, «işğalciler zaten bunı beklediler».
Ukrainada Qırımdan köçip kelgen adamlarnıñ teşebbüsi ile Qırım işğaline qarşı informatsion kampaniya başlandı. Onıñ çerçivesinde fotosergi, brifing, telemarafon, konferentsiyalarnıñ keçirilmesi planlaştırıla. Qırım işğaliniñ yıllığı ile bağlı tedbirler mart 15-ke qadar devam etecek.
