Amerika Qoşma Ştatları bildire ki, ukrainli Nadejda Savçenkonıñ Rusiyede apiste tutulması ve oña nisbeten yapılğan areketler iç bir şeyge uymay.
AQŞ Devlet departamenti Rusiyeni 2014 senesi sentâbr ayında tizilgen Minsk añlaşmaları ve fevral 12-ge ait olarnıñ amelge keçirilmesi aqqında añlaşmalarğa riayet etip, Savçenkonı ve diger ukrain esirlerini azat etmege çağırdı.
AQŞ-nı mahkemeniñ Nadejda Savçenkonıñ apis cezasını mayıs 13-ke qadar arttırmaq qararı qasevetlendire, dep ayttı çarşenbe künü, fevral 25-te, Devlet departamenti. O, Savçenko 75 kün devamında Rusiye apishanesinde açlıq tutqanını hatırlattı.
Çarşenbe künü, fevral 25-te, Moskva şeer mahkemesi Moskva SİZOsında 70 kün devamında açlıq tutqan ukrain uçucısı Nadejda Savçenkonı apiste qaldırdı. Mahkemede video bağ vastası ile iştirak etken Savçenko kelecek mahkeme toplaşuvına qadar sağ qalmay bilecegini ayttı.
Rusiyede Nadejda Savçenkonı Donbassta elâk olğan Rusiye jurnalistleriniñ ölümine alâqası olğanında qabaatlaylar. İyünniñ soñunda separatistler onı esir alıp, Rusiye arbiylerine teslim ettiler. Bundan soñra Savçenkonı Rusiyede apiske aldılar. İmayeniñ malümatına köre, onıñ jurnalistlerniñ ölümine alâqası yoq, çünki o, esarette edi. Savçenko bütün qabaatlarnı red ete.
Yanvar ayınıñ soñunda taqiqatçılar Savçenkoğa qarşı sıñırdan qanunsız keçüv aqqında daa bir cinaiy iş açılğanını bildirdiler.
Nadejda Savçenko 8-inci çağırılış Ukraina halq deputatı, Avropa Şurası Parlament Assambleyasında Yuqarı Radanıñ delegatı olıp, halqara immunitetke saip.
Minsk añlaşmaları esir alınğan adamlarnıñ azat etilmesini belgiley.
Buña baqmadan, Rusiye Savçenkonı azat etmege istemey.
