Çarşenbe künü, fevral 25-te, Qırımtatar akademik teatrinde qırımtatar icracılarınıñ iştiraki ile hayriye kontsert keçirildi.
Qırım.Aqiqat mühbiriniñ bildirgenine köre, kontsert teşkilâtçıları bütün toplanğan para on yaşında hasta olğan Ervin Kadırovnıñ tedaviylenmesine sarf etilecegini ilân ettiler.
«Bunıñ kibi kontsertlerni birinci ve soñki kere keçirmeyik, böyle tedbirlerni hasta olğan balalarğa para toplamaq içün er ay ötkermege tırışamız. Keçken kontsertte 160 biñ ruble topladıq. Mence, tedaviylev içün bayağı para», – dep ayttı teşkilâtçılardan biri Ahtem Mecitov.
Kontsert programmasında qırımtatar artistleri iştirak ettiler: Eşnayt, Edip Bağçasaraylı, Zore Kadıyeva, Selsebil, Uryane Kenjikayeva, Elina Sosnovskaya, Emine Mustafayeva, Alim Hakimov, Ayşe Hakimova, Elnara Seydametova, Tañ Yıldızı, STAZIS, «Lüdi T» KVN taqımı, Gençlik, «Uçan-Çu» ansambli, «Cemile» ansambli, Qırım ansambliniñ solistleri.
Teşkilâtçılarnıñ aytqanına köre, bunıñ kibi hayriye kontsertler ileride de keçirilecek.
