Link açıqlığı

Büyük Britaniya Ukrainağa qoşma arbiy yardım kösterecek, – dep ayttı çarşenbe künü, fevral 25-te, Büyük Britaniya mudafaa naziri Michael Fallon.

«Bizler Ukrainağa arbiy yardım kösterecekmiz, qısqa müddetli talimler keçirilmesi içün mesleatçılarımıznı ve taqımlarımıznı yollaycaqmız. Bunı Ukraina ükümeti istegen edi», – dep qayd etti Fallon.

Radio Svoboda bildire ki, Büyük Britaniya mudafaa naziriniñ aytqanına köre, bu yardım martnıñ ortasından itibaren kösterilecek. O, letal silâ berilmeycegini qayd etti.

«Bizler neletal yardım kösterecekmiz», – dep qayd etti Michael Fallon.

Fevral 24-te Britaniya baş naziri David Cameron dedi ki, Britaniya arbiyleri ukrain arbiylerine mesleatlar berecekler.

Fevral 12-de Ukraina, Frenkistan, Almaniya ve Rusiye liderleri Donbassta fevral 15-ten itibaren ateş toqtatılması aqqında añlaştılar. Rusiyege qoltutqan separatistler ve Rusiye ordusı Donetsk vilâyetiniñ Debaltsevo şeerine ücüm etmege devam etip, ukrain askerlerini çekilmege mecbur ettiler.

Separatistler ukrain tarafını rejim bozulmasında qabaatlaylar. Rusiye ise mezkür añlaşmalarnıñ yalıñız «kefili» olğanını ayta.

Ukraina ve Ğarp Rusiyeni Donbasstaki separatistlerge yardım kösterilmesinde qabaatlaylar. Moskva bunı red ete. Rusiye dey ki, Donbassta yalıñız «göñülliler» cenkleşe bile.

XS
SM
MD
LG