Link açıqlığı

Bağçasaray meclisiniñ binadan çıqarılması aqqında iş boyunca mahkeme mart ayına qaldırıldı


Qırımtatar Milliy Meclisiniñ azası İlmi Ümerov

Kira añlaşmasınıñ toqtatılması ve binadan Bağçasaray regional meclisiniñ çıqarılması aqqında iş boyunca mahkeme toplaşuvı 2015 senesi mart 10-da keçirilecek. Bunı Qırımtatar Milliy Meclisiniñ azası İlmi Ümerov Qırım.Aqiqat mühbirine bildirdi.

«Mahkeme fevral 10-da keçirilecek edi, lâkin onı bir ayğa qaldırdılar. Eskiden bu meselelerni Ahtem Çiygoz (Meclis reisiniñ muavini, Bağçasaray regional meclisiniñ reisi – muar.) baqqan edi. Şimdi, añlağanıma köre, bu meselelerni men ögrenecem», – dep ayttı Ümerov.

«REP JF BGS» kommunal müessisesiniñ Bağçasaray meclisi yerleşken Puşkin, 1 adresinde binanı kirağa alğan «Sovet üçiteley» cemaat teşkilâtına açqan davası boyunca añlaşma kiracı tarafından bozulğanı aqqında qarar qabul etilgen edi, böyle etip kira añlaşması toqtatılmaq kerek.

Regional meclisniñ mahkeme toplaşuvından haberi olmadı.

Bundan evel Qırımtatar Milliy Meclisini Aqmescit merkezindeki «Qırım» Fondu» Hayriye teşkilâtına ait binadan çıqarğan ediler.

Noyabr 18-de Aqmescitte mahkeme toplaşuvında «Qırım» Fondu» Hayriye teşkilâtınıñ reberi Riza Şevkiyevni 350 biñ rublege cezaladılar, fondnı ise – 4,5 million rublege. «Qırım» Fondu» Hayriye teşkilâtınıñ mal-mülki, şu cümleden Aqmescitniñ merkezinde yerleşken binanı, açıq bazarğa çıqarmağa planlaştıralar.

XS
SM
MD
LG