Rusiye Ramzan Kadırov ile yolbaşçılığında Çeçenistanda yapqanı kibi Qırımda akimiyetke qoltutqan qırımtatarlarından ükümetni şekillendirip olamaz.
Bunı Qırımtatar halqınıñ aq-uquqlarını qorçalav komitetiniñ koordinatorı, Qırımtatar Milliy Meclisiniñ azası Abmecit Suleymanov fevral 25-te Kiyevdeki matbuat konferentsiyasında ayttı.
«Qırım akimiyeti Mecliste aza olmaq aqqından marum etkenimiz Meclisniñ sabıq azalarını qullanıp, bunı yapacaq ola. Şantaj, basqı vastasınen akimiyet olarnı sıqıştırmağa istey, ve kadırovlılar kibi bir taqımnı şekillendirecek ola. Lâkin olar bunı yapamazlar», – dep ayta Suleymanov.
Onıñ qayd etkenine köre, yarımada işğalinden itibaren qırımtatarlar, şu cümleden Meclis vekillerine, basqı toqtatılmay.
Soñki yaqalavlar arasında – Meclis reisiniñ muavini Ahtem Çiygoznıñ yaqalanması. Onı 2014 senesi fevral 26-da olıp keçken mitingde qanunsız areketlerde qabaatlaylar. Uquq qorçalayıcılar eminler, Qırım akimiyeti tarafından repressiyalar artacaq.
