Qırımtatar halqınıñ yetekçisi, dissident, uquq qoruyıcı Mustafa Cemilev Rusiye apishanesinde bulunğan Ukraina uçucısı Nadejda Savçenkoğa açlıqnı toqtatmağa rica etti. Bunı fevral 24 künü gordon ukrain neşiri yaza.
«Nadâ, qızım, açlıqnı devam etmege endi acet yoq. Rusiye insaniyetlik printsipleri olğan memleket degildir. Biz Ukrainada seni mıtlaqa qurtarırmız, amma diger usullar ile», – dedi Mustafa Cemilev.
Mustafa Cemilev Sovet apishanelerinde 15 yıl bulundı, bir qaç kere açlıqnı ilân etken edi, Omsk apishanesinde eñ çoq – 303 kün devam etken açlıqnı tuttı. Eñ qıyın vaqıtları apishane ekimleri onı mecburen zond vastası ile aşata ediler.
«Dmitriy Gordonda musafirlikte» leyhasında Mustafa Cemilev 1976 senesi onı sovet fizikacı, dissident ve uquq qoruyıcı Andrey Saharov açlıqnı toqtatmağa qandırğanı aqqında tarif etti.
Salı künü fevral 24-de Mustafa Cemilev gordon neşiri vastası ile qanunsız tevqifke qarşı 74 kün açlıqnı tutqan uçucı Nadejda Savçenkoğa onı toqtatmağa muracaatı ile bulundı.
Rusiye akimiyeti Savçenkonı iyün 17 künü Lugansk civarında Rusiye jurnalistleriniñ ölüminde qabaatlay. Ukrain uçucısı qabaatnı red ete ve bundan evel separatistler tarafından zapt etilip, Rusiyege ketirilgenini bildire. Yanvarniñ soñunda Savçenkoğa nisbeten – sıñırdan qanunsız keçüv boyunca cinaiy iş açıldı. Moskva Basman mahkemesi fevral 10 künü uçucı Nadejda Savçenkonıñ tevqifini mayıs 13-ne qadar uzatqan edi.
2014 senesi dekabr 13-de Savçenko açlıqnı ilân etti ve onı alâ daa tuta.
