Qırımlılarğa Yalta-İstanbul arasında daimiy deñiz yolcu alâqasını ğayrıdan açmağa söz bereler. Salı künü, fevral 24-de, Qırımnıñ kurort ve turizm naziriniñ muavini Оlga Burova aytqanı kibi, gemiler Yalta limanlarına aprel ayından yürmege başlaycaq, – haber ete RİA Novosti
Onıñ sözlerine köre, «Adriana» gemisi Yalta – İstanbul arаsında yürecek, Yaltadan er cumaertesi künü çıqacaq, İstanbulda üç kün olıp, cuma künü Yaltağa qaytacaq.
«Qırım turoperatorlarımız ile Qırımnı ziyaret ete bilecek türk turistleri içün «Adriana» gemisiniñ qatnav cedveline kelişken mahsus ziyaretlerni teşkil etecekmiz», – dedi Burova.
Evel aytılğanı kibi, yazda Qırım akimiyeti Aqmescitten Türkiyege halqara seferlerini ğayrıdan açacaq edi. Uçaq Anapada enip, İstanbulğa uça edi, böyleliknen akimiyet cezalardan qaçınmağa tırışa edi. Amma küzde İstanbul ve Aqmescit arasında ava alâqası toqtatıldı.
