Link açıqlığı

Köçip kelgenlerge Kiyevde urba ve ilâclarnı satın almağa yardım ettiler


Kiyevde köçip kelgenlerniñ balalarına Qırım diasporası urba ve ilâc almağa yardım etti

Kiyevde Qırımdan ve Ukraina şarqiy vilâyetlerinden köçip kelgenlerniñ ailelerinden tahminen 500 balaçıqqa urba, ayaqqap, ilâclarnıñ satın alınuvı ile yardım ettiler. Qırım.Aqiqatqa «Qırım diasporası» cemaat teşkilâtınıñ idare reisi Anatoliy Zasoba aytqanı kibi, bunı yerli teşebbüslerniñ Kanada Fondunıñ yardımı ile becerdiler.

Onıñ sözlerine köre, yardımnı şimdi Kiyevde ve Kiyev vilâyetinde yaşağan köçip kelgenlerniñ ailelerine kösterdiler.

«Bu sefer aynı şu regionğa diqqat ayırdıq, çünki bundan evel büyük yardım diger regionlarğa kete edi, Kiyev ise köçip kelgenlerniñ sayısı eñ çoq olğan regionlarnıñ sırasına kire. Yardımnı elde etkenlerniñ sayısını şeriklerimiz, şu cümleden Darnitsadaki «Bala evi» tükânı yardımı ile çoqlaştırıp oldıq», – dedi Anatoliy Zasoba.

Yardımğa ariza yollağan insanlar bala urbası tükânına davetnamelerni elde ettiler, mında olarğa biñ grivnağa urba ve ayaqqapnı almağa imkân berile edi, – dep añlattı Qırım.Aqiqatqa Qırımnıñ Aqmescit rayonından Brovarı rayonına köçken qırımlı Sevara.

«Ailmizde on eki, doquz buçuq, sekiz ve dört yaşında olğan balaçıqlar bar. Yardım aqqında ilânnı kördim, telefon açtım. Maña vesiqalarnı ve köçip kelgenniñ malümat kâğıtını ketirmege ayttılar», – dep añlata qırımlı.

«Qırım diasporası» cemaat teşkilâtınıñ idare reisi Anatoliy Zasoba aytqanı kibi, teşkilâtta ileride de köçip kelgenlerniñ balalarına yardım etmege planlaştıralar.

«İleride er aftalıq ustalıq dersleri, teatr, müzey ve kino ziyaretleri, vatanperver resimlerniñ yarışları ve Kiyevde Köçip kelgenlerniñ destek Merkeziniñ açılışı planlaştırıla», – dedi o.

Fevral 9-na olğan malümatqa köre, Ukraina içtimaiy siyaset nazirligi ATO ve Rusiye tarafından işğal etilgen Qırımdan köçip kelgen bir millionğa yaqın insannı qayd etti.

XS
SM
MD
LG