Ukraina halq deputatı, uçucı Nadejda Savçenkonıñ hırsızlavı ve mahkeme taqibi içün mesülietli şahıslarnıñ cevdelinde birinci yerni Rusiye prezidenti Vladimir Putin aldı. Radio Svoboda bildirgeni kibi, soyadlarınıñ cedveli «Batkivşçina» firqasınıñ saytında aşkâr etildi.
Birinci beşlikte – Federal havfsızlıq hızmetiniñ, Rusiye prezidenti memuriyetiniñ ve Taqiqat komitetiniñ yolbaşçılığı. Cedvelde «LHC» teşkilâtınıñ yetekçisi İgor Plotnitskiy de bar, Nadejda Savçenkonıñ imayesi onı uçucınıñ hırsızlavı ve Rusiyege ketirüvinde qabaatlay.
«Savçenko cedveli» – uçucınıñ tutıp alınması, Rusiye Federatsiyasına ketirilmesi, qanunsız sürette tutılması, oña qarşı işniñ qalplıq etilmesine bağlı olğan 35 insan cedvelidir. Bu insanlar mesüliyetke çekilmeli. Dünya olarğa qarşı şahsiy cezalarnı kirsetmeli», – dep añlattı «Batkivşçina» firqasından halq deputatı İvan Krulko.
«Список Савченко» – 35 осіб, причетних до справи проти Надії Савченко: http://t.co/gxZHdzw8qN #FreeSavchenkopic.twitter.com/d2tT0D1LVu
— ВО Батьківщина (@Batkivshchyna) 24 Лютий 2015
Rusiye akimiyeti Savçenkonı iyün 17 künü Lugansk civarında Rusiye jurnalistleriniñ ölüminde qabaatlay. Ukrain uçucısı qabaatnı red ete ve bundan evel separatistler tarafından zapt etilip, Rusiyege ketirilgenini bildire. Yanvarniñ soñunda Savçenkoğa nisbeten – sıñırdan qanunsız keçüv boyunca cinaiy iş açıldı. Moskva Basman mahkemesi fevral 10 künü uçucı Nadejda Savçenkonıñ tevqifini mayıs 13-ne qadar uzatqan edi.
2014 senesi dekabr 13-de Savçenko açlıqnı ilân etti ve onı alâ daa tuta.
«Batkivşçina»da «Savçenko cedveli» «Magnitskiy cedveli»ne köre teşkil etilgenini bildireler.
Sergey Magnitskiy – Rusiye adliyecisi, Moskva SİZOsında elâk oldı. Bundan soñ AQŞ onıñ ölümine alâqası olğan şahıslarğa nisbeten sanktsiyalarnı kirsetti.
