Krım-SOS göñülliler teşkilâtınıñ taqımı qırımtatarlarnıñ milliy lideri Mustafa Cemilevniñ ömrü aqqında vesiqalı filmniñ çıqarılmasına 89,8 biñ grivna topladı.
Teşkilâtnıñ saytında berilgen malümatqa binaen, leyhanı ömürge keçirmek içün 150 biñ grivna lâzim, 172 kişi maddiy yardım kösterdi. Hayriye parası daa bir ay devamında toplanacaq.
«Bu filmde bizler siyasetçini degil, bütün yeñiş, meraqları ve qorquları ile bir şahsiyetni köstermege tırışacaqmız. Film Mustafa Cemilevniñ ömründen ikâyelerge esaslanacaq. Bediiy film seyircilerge Mustafanıñ taqdiriniñ eñ müim vaqialarını yaşamağa ve onıñ közleri ile sovet keçmişi ve zemaneviy Ukraina ve dünyağa baqmağa imkân berecek», – dep aytalar leyhanıñ müellifleri.
Olarnıñ malümatına köre, sermiya arhiv malümatları ve video toplanması, stsenariy yazılması ve bir qaç memlekette birinci levhalarnıñ çıqarılması, Mustafa Cemilev ve Sovetler Birliginiñ dissidentleri ile video subetine sarf etilecek. Böylece, masraflarnıñ ekseriyeti taqımnıñ işi, arhiv malümatlarını qullanmaq aqqınıñ ödemesi ve video çıqarılmasına ketecek.
KrımSOS – 2014 senesi fevral 27-de Rusiye Federatsiyasınıñ Qırım Muhtar Cumhuriyeti işğaliniñ başlanmasında göñülliler tarafından meydanğa ketirildi. KrımSOS Ukrainada Birleşken Milletler Teşkilâtınıñ Qaçaqlar meseleleri boyunca Yuqarı Komissarı idaresiniñ icra ortağı ola. KrımSOS Qırım ve şarqiy regionlarda mecburen köçip kelgen insanlarğa yardım ete, em de Qırımdaki vaqialar aqqında malümat bermekte.
