Link açıqlığı

Nariman Celâl: qırımtatarlarnıñ havfsızlığını temin etmek içün atılğan adımlar körünmey


Nariman Celâl

Qırımtatar Milliy Meclisiniñ reis muavini Nariman Celâlniñ fikirince, Qırım sakinleri, şu cümleden tamır halqınıñ, havfsızlığını temin etmek içün tam bir areketler yapılmay.

Bunı o, Ukraina prezidenti Petro Poroşenkonıñ beyanatını izaatlap, Qırım.Aqiqatqa bildirdi.

«Bugünki vaziyette bizler devlet yolbaşçıları, prezidentleriniñ beyanatlarına degil, areketlerine esaslanaycaqmız», – dep qayd etti Celâl.

Onıñ bildirgenine köre, beyanat ve vesiqalar «çoq oldı», lâkin «qırımtatarlar ve umumen Qırım, Ukraina, Rusiye sakinleriniñ havfsızlığı içün atılğan adımlar körünmey».

«Bugünki künde, menim fikirimce, bir-birini qabaatlağan beyanatlar keçmişte qalmaq kerek, – dep tüşüne Meclis reisiniñ muavini. – Vaziyet o qadar kergin ki, bir kimsege kerekmegen zıddiyete (Ukraina şarqında – muar.) biñlernen elâk olğanlarnı saymaq mümkün. Şunıñ içün birine mahkemeni vade etip, qabaatlamaq, birisine Baş prokuraturağa ariza yazmaq – ekinci derece işler», – dep tüşüne Celâl.

Qırım işğali yıllığında Ukraina prezidenti Petro Poroşenko ukrain devleti Rusiye tarafından işğal etilgen yarımadanı qaytarmağa devam etecegini ve yarımadanıñ bütün sakinleriniñ aq-uquqları ve menfaatları temin etilecegini bildirdi. Qırım cumhuriyetiniñ yolbaşçısı Sergey Aksenov Ukraina prezidentini «Qırım mahkemesi» ile qorquzmağa başladı.

XS
SM
MD
LG