Link açıqlığı

Çubarov: Rusiye yarımadanı arbiy noqtağa çevirmek içün boysunmağan qırımlılarnı quva


Rusiye işğal etilgen Qırımdan arbiy közetme noqtasını yapacaq ola, bu sebepten yarımadada adam çoq olmasına aceti yoq. Bunı Qırımtatar Milliy Meclisiniñ reisi Refat Çubarov brifingde bildirdi.

Onıñ aytqanına köre, işğalci akimiyet içün eñ büyük telüke qırımtatarlar ola, şunıñ içün olar taqiplerniñ qurbanları olalar.

«Böyle etip (qırımtatarlarnı taqip etüv vastası ile – muar.) bir qaç mesele çezile: qırımtatarlarnıñ bölünmesi, digerlerni qorquzuv, qırımtatarlarnı yoq etüv. Bu Qırımnı Rusiyeniñ arbiy noqtası olaraq körgen Rusiyeniñ Qırımdaki bazı vazifelerine mensüp. Ve Rusiyeniñ arbiy noqtasında o qadar çoq eali olmasına kerek yoq, iqtisadiy vaziyet de buña uyğun degil. Rusiye adamlarnı Qırımdan quva, ve qırımtatarlarnı qaçırıp ve öldürip, bu işke başladı», – dep ayttı Çubarov.

Refat Çubarovnıñ malümatına köre, Qırım işğali vaqtında 130 qırımtatarına qarşı cinaiy iş açıldı, 18 qırımtatarı qaçırıldı ve on kişi öldürildi.

Çubarovnıñ bildirgenine köre, bu resmiy malümat degil: statistikanı tizmek qolay degil, tam malümat uquq qorçalayıcılarda bar.

Çubarovnıñ aytqanına köre, bir yıl devamında Qırımnı 20 biñ insan, olardan 8-10 biñ – qırımtatarı, terk etti.

XS
SM
MD
LG