İşğal etilgen Qırımda reberlikni saylamaq içün Qırımtatar Milliy Qurultayınıñ keçirilmesi muzakere etilmey bile, – dep ayttı Qırımtatar Milliy Meclisiniñ reisi Refat Çubarov Radio Svobodağa.
Onıñ aytqanına köre, böyle bir şey olsa, Qurultaynıñ bazı vekillerine basqı yapılacaq, çünki şimdi Meclis azaları basqı altında qaldılar.
«Bugünde-bugün Meclis azalarını Federal havfsızlıq hızmeti (FSB) ya da taqiqat komitetiniñ bazı hadimlerine çağıralar, olarğa Mecliste ne yapacaqlarını aytıp, belli bir namzetke qoltutacaqlarını emir eteler. Netice bir ola: «ya Çubarovğa qoşulasıñız, ve biz sizni Qırımdan atamız; ya da apiste olğan Ahtem Çiygozğa qoşulasıñız. Ya da «rica etkenimiz» kibi yapacaqsıñız», – dep añlattı Çubarov işğalci akimiyetniñ Meclis azalarına yapılğan basqını.
Çubarovnıñ bildirgenine köre, yarımada azat etilgenine qadar «işğalge qarşı çıqqan adamlarnı toplamaq imkânsız, çünki olarnıñ işğalcilerge qarşılıq köstermek içün adımlarnı muzakere etmek çareleri olmaz».
Onıñ aytqanına köre, qırımtatarlar Qurultaynı Qırımdan tış, misal olaraq, Türkiye ya da Romaniyada, keçirmek imkânlarını baqalar. Lâkin «olarnı Qırımğa keri almay bileler», dep ayttı Çubarov.
