Qırımnıñ öz başına ilân etilgen baş naziri Sergey Aksenovnıñ fikirince, prezident Petro Poroşenko ile yolbaşçılığında Ukraina akimiyeti mahkeme etilmek kerek.
Böyle etip Aksenov Poroşenkonıñ Qırım işğaliniñ bir yıllığı ile bağlı beyanatını jurnalistlerge izaatladı.
«Bizler oña (Poroşenkoğa, – muar.) Qırım mahkemesini vade etken edi. Emin oluñız, olacaq. Mında ketirip, mahkeme etecekmiz», – dep ayttı Aksenov.
O, Kiyevge Qırım qaytarılması ile bağlı «hayal qurmamağa» tevsiye etti.
«Qırım özüni tarihiy vatanına qaytardı, ve bu öyle de qalacaq. Hayallarını aqıllarından alıp taşlasınlar», – dep ayttı Qırım baş naziri.
Petro Poroşenko fevral 23-ni Qırım işğaliniñ başlanğıçı dep adladı. Onıñ qayd etkenine köre, Ukraina devleti Rusiye tarafından işğal etilgen Qırım oğrunda küreşine devam etecek. Keçken sene Qırımda olıp keçken vaqialarnı ve sahte referendumnı Ukraina prezidenti «Rusiyeniñ Ukrainağa qarşı istilâsını gizlemek içün yapılğan fars» olaraq adladı.
