Ukraina prezidenti Petro Poroşenko qırımtatarlarnıñ milliy yetekçisi Mustafa Cemilev, Qırımtatar Milliy Meclis reisi Refat Çubarov ve Qırımtatar Milliy Qurultayınıñ vekili Rustem Ümerov ile körüşti.
Körüşüv devamında işğal etilgen Qırımnıñ meselelerini muzakere ettiler, er bir mesele boyunca prezident öz Memuriyetiniñ bölüklerine mütenasip avalelerni berdi. Bunı Çubarov öz Facebook saifesinde bildirdi.
«Tabiiy ki, köterilgen meseleler Rusiye orduları tarafından işğal etilgen yarımada ve Qırımda insan aqlarınıñ qoruvı ile bağlı edi...», – dep yazdı Çubarov.
«Ümüt etem ki, halqara sevisinde planlaştırılğan teşebbüslerimizniñ neticesi de semereli olur», – dep qoştı o.
2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
