Gece, fevral 19-da, belgisiz insanlar Bağçasaray rayonı Büyük Süyren köyüniñ ibadet evine kirdiler. Cinayetçiler aqçanı hırsızlaycaq edi, amma tapıp olamadılar.
İmam Eskender Kürtiyevniñ sözlerine köre, fevralniñ 9 ve 10 künleri Qırımnıñ diger üç camisinde yüz bergen abravlardan soñ, yerli musulman cemiyetiniñ hazine idaresi tarafından sadaqа aqçası saqlanıldı, dep bildire Qırım Musulmanları diniy idaresi.
«Hırsız arttaki pencereni qırıp, binağa kirdi. Sadaqa qutusı açılğan edi, amma aqça anda yoq edi. Diger camilerimizde yüz bergen abrav aqqında haberlerden soñ iane parası içün mesülietli hazine idaremiz paranı çığarğan edi. Aqça tapıp olamağan cinayetçi kilimni çıqaracaq edi, amma ağır olğanından sebep beceralmadı. Cuma namazğa kelgende, kilim qataqlanğanını, sadaqa qutusı ise açılğanını kördik», – dedi Kürtiyev, ve ziddiyet aqqında uquq qoruyıcı organları haberdar olğanını bildirdi.
İmamnıñ sözlerine köre, evellleri hırsızlıq mında yoq edi. İbadet evi köy musulmanlarınıñ esabına 2005 senesi quruldı. Kürtiyevniñ malümatına binayen, Büyük Süyren köyünde 70-ke yaqın qırımtatar qorantası yaşay.
Malüm olğanı kibi, Qırımda eki kün içinde üç camide hırsızlıq oldı. Fevral 9-dan fevral 10-na keçer gecesi Aqmescit rayonınıñ Mamaq köyündeki «Yeşil camide» hırsızlıq oldı. Fevral 9-da aqşam Qurman rayonınıñ Büyük Onlar qasabasında belgisiz şahıslar camige kirip, sadaqa parasınıñ qutusından para aldılar. Fevral 9-dan 10-na keçer gecesi İslâm Terek rayonı Tamğacı (İzümovka) köy camisinde hırsızılq yüz berdi.
