Link açıqlığı

Roskomnadzor Qırım kütleviy haber vastalarını qayd etmey


Alâqa, informatsion tehnologiyalar ve kütleviy bağlar Federal hızmeti Qırım Haber Agentligine (QHA) Qırımda çalışmağa izin bermedi.

Agentlikniñ malümatına köre, hızmet Rusiye Federatsiyasınıñ 1991 senesi dekabr 27-ne ait №2124-1 «Kütleviy haber vastaları aqqında» Qanunınıñ 13-ünci maddesine esaslana.

«Agentligimiz işbu qararnı beklemegenini aytamam, bizler böyle bir şey olacağını beklegen edik. Mında sebebi pek meraqlıdır. Bizler redniñ eki variantını aldıq – bir danesi Roskomnadzor saytında elektron şeklinde berildi, ekincisi ise – kâğıtta. Soñki vesiqada elektron şeklinde berilgen cevapta olmağan bir sebep bar – «yañlış» malümatlarnıñ berilmesi», – dep qayd etti QHA müdiri Gayana Yüksel.

Onıñ aytqanına köre, agentlik 2014 senesi oktâbr ayında Roskomnadzorğa muracaat etken edi. Bir buçuq aydan soñ hızmet arizanı tüzetmek kerek olğanını bildirdi. Mütehassıslar ile aqıl tanışqan soñ vesiqa tüzetilip, kene de Moskvağa yollanıldı. Lâkin kene de ruhset berilmedi.

«Bizler agentligimiz aqqında angi malümat yañlış olğanını ögrenmek içün Roskomnadzorğa elektron şekilde muracaat ettik, cevap mart 12-de kelmeli, lâkin añlağanıma köre, kütleviy haber vastalarını qayd etmege istemeseler, qanunda izin bermemek içün madde tapılır», – dedi Gayana Yüksel.

QHA Qırımda 2006 senesinden berli çalışmaqta, saytta rusça, türkçe, inglizce malümat berilmekte.

Qırım jurnalistleri Birliginiñ yolbaşçısı Andrey Trofimov bildirdi ki, 2015 senesiniñ başında 100 Qırım matbuat vastası Rusiye litsenziyasını aldı. Onıñ malümatına köre, keçken sene yarımadada 3 biñ neşir qayd etilgen edi.

Noyabr ayında Rusiye Devlet Duması Qırım kütleviy haber vastaları içün keçici müddetni 2015 senesi aprel 1-ge qadar arttırdı. Bu vaqıtqa qadar olarnıñ Ukraina devlet organları tarafından berilgen vesiqalar esasında çalışmaq aqqları bar.

XS
SM
MD
LG