Fevral 20-de Qırım camilerinde qırımtatar devlet erbabı, Qırım, Poloniya, Aqrusiye ve Litvaniya müftisi Noman Çelebicihannıñ hatırasına dua merasimleri keçirildi.
Aqmescitniñ Kebir Camisinde Qırım musulmanları Diniy idaresiniñ vekilleri, qırımtatar milliy areketiniñ veteranları, qırımtatar gençleri toplaştılar. Dua merasimini cami imamı Niyaziy Ramazanov keçirdi.
Bunı QMDİ matbuat hızmeti bildire.
İmam Noman Çelebicihannıñ ömür ve faaliyeti, qırımtatar halqınıñ tarihındaki rolü aqqında tarif etti.
«Bu adam qırımtatar halqınıñ tarihında ayrı bir yer tutmaqta. O, qıyın zamanlarda mesülietten qorqmayıp, yalıñız qırımtatarlarğa degil, bütün Qırım sakinlerine ömrü ve canını bağışladı. Onıñ Qurultayda yapılğan Qırım halqlarını çeçekler ile qıyaslavı Qırımda barışıq ve muabbetlik yapmaq ıntılışını isbatlay. Bu sebepten onı dualar ile añmaq bizim borcumızdır», – dep qayd etti Müfti muavini Ayder İsmailov.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. 20-nci asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ milliy gimniniñ müellifi ola. 1917 senesi Fevral inqilâbından soñ Musulman icraiy komitetiniñ reisi, Qırım müfisi – soñra ise Birinci Qırımtatar Milliy Qurultayınıñ reisi ola. 1918 senesi yanvar ayında bolşevikler tarafından yaqalana, fevral 23 künü apiste deñizciler tarafından öldürile. 33 yaşında olğan müftiniñ cesedi deñizge atıla.
