Link açıqlığı

Aqyarda Qırım işğali yıllığına bağışlanğan tedbirlerden sebep naqliyat areketi sıñırlanacaq


Fevrаl 20-den başlap Aqyarda Qırımnıñ Rusiyege «qoşuluvı» yıllığı munasebeti ile bir sıra tedbirlerniñ keçirilmesi planlaştırıla. Bu sebepten fevral 23 künü saat 14:00-15:00 arasında merkeziy şeer alqasında şahsiy naqliyat yürüşi sıñırlanacaq. Bu vaqıtta «halq imayesi» ve Nahimov adına Aqyar kazaklarınıñ yürüşi keçirilecek.

Bunı Aqyar ükümetiniñ matbuat hızmeti bildire.

Plan boyunca tedbirlerni ekige böldiler. Bir qısmı bu raatlıq künleri, ekincisi mart ayında ötkerilecek.

Cumaertesi künü, fevral 21-de, Aqyarda Vatan qoruyıcısı Künü munasebeti ile qış yaldav aveskârları körüşecek, Nahimov meydanında «Antimaydan» şiarı altında kontsertler, Aqyar valisi, «Gece börüleri» yetekçileri ve «halq imayesi» vekilleriniñ iştiragi ile miting keçirilecek.

Fevral 23 künü sabadan aqşamğa qadar 2014 senesi baar vaqiaları aqqında vesiqalı filmlerni kösterecekler. Deñiz vokzalında Qara deñiz flotunıñ arbiy gemilerine ziyaret, «Qızıl qaranfil» vatanperver yırınıñ festivali ve diger tedbirler teşkil etildi.

Mart 10-18 künleri şeerde tedbirlerniñ ekinci qısmı keçecek. Şu vaqıtta avtoyürüşler, «Nezaketli insanlar» arbiy-alan yarışınıñ finalı, Moskva ve Sankt-Peterburg icadiy taqımlarınıñ iştiragi ile kontsertler ve bayram fişenklerniñ olması planlaştırıla.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG