Link açıqlığı

Cemilev: Rusiyeniñ Qırım qoşulmasını Almaniyanıñ Avstriya qoşulması kibi cinayet olaraq tanıycaqlar


Rusiyeniñ Qırım qoşulması ileride cinayet olaraq tanılacaq, – dep ayttı qırımtatar halqınıñ lideri Mustafa Cemilev fevral 19-da Venadaki OSCE Parlament Assambleyasınıñ Qış körüşüvinde. O, 2014 senesi Rusiyeniñ Qırım işğalini 1938 senesi Gitler Almaniyanıñ Avstriya qoşulması ile qıyasladı. Bu aqqında Ukraina prezidentiniñ qırımtatar halqı işlerinden vekâletlisiniñ Facebooktaki resmiy saifesinde aytıla.

Cemilevniñ aytqanına köre, «referendumda» Qırım sakinleriniñ yalıñız 35 fayızı rey berdi. Qırımtatarlar ise saylavnı boykot ettiler, bunı Rusiye Federal havfsızlığı hızmetiniñ vesiqaları da tasdıqlay.

«Rusiye tarafı esaslanğan referendum silâ ile işğal vaqtında keçirildi. Bu Gitler Almaniyanıñ 1938 senesi işğal etilgen Avstriyada keçirgen referendumğa oşay. O vaqıt da 99,73%-nıñ qoşulmasına rey bergenini ayttılar. Lâkin 1945 senesi Nürnberg esnasında bu qoşulma cinayet olaraq tanıldı», – dedi Cemilev.

Malüm olğanı kibi, Ukraina prezidentiniñ qırımtatar halqınıñ işlerinden vekâletlisi Mustafa Cemilev Venağa yol aldı, mında bu künleri Qış Körüşüvi 2015 keçe. Qırımtatarlarnıñ milliy yetekçisi ile Avstriya paytahtında işğal etilgen Qırım vaziyeti muzakere etilecek.

Ukraina halq deputatı aytqanı kibi, OSCE memleket deputatlarınıñ toplaşuvında Rusiye Federatsiyasınıñ temsilcileri olarnıñ mevamı doğru olğanını tasdiqlamağa ve Qırım vaziyetini yañlış sürette köstermege tırışacaqtır.

XS
SM
MD
LG