Kezlevniñ şeer mahkemesinde Cuma Camini («Han Cami» olaraq belli olğan) «Tavriya müftiyatınıñ» temsilcilerinden boşatılması aqqında işi boyunca soñki toplaşuv olıp keçti, dep haber ete Qırım musulmanları Diniy idaresiniñ matbuat hızmeti.
QMDİ qayd etkenine köre, qanunsız areketlerge yol bermemek içün Qırım musulmanları Diniy idaresi mahkemege muracaat etti. 2014 senesi noyabr 25-te Kezlevniñ şeer mahkemesinde bunıñnen bağlı dava açıldı. Bir qaç mahkemeden soñ, 2015 senesi fevral 17-de Qırım musulmanları Diniy idaresiniñ davası tolusınen qarşılandı.
«Kerçek yeñdi. Camide olğan şahıslarnıñ bir de bir vesiqaları yoq edi. Qırım musulmanları Diniy idaresi ise bu caminiñ saibi olğanını tasdıqladı. Bu şahıslar camiden daa ketmediler, olarnıñ bir ay içinde mahkeme qararına itiraz etmek aqqları bar. Elbet de, bizim fikirimizce, olarnı bu qarar quvandırmaz, lâkin, Tavriya müftiyatınıñ bu camide bulunmaq aqqını tasdıqlağan vesiqaları olmağanını tekrarlayım», – dep qayd etti QMDİ uquqçısı İbraim Kaymakan.
QMDİ bildirgenine köre, 2014 senesi yaznıñ soñunda Elmar Abdulganiyevniñ teşebbüsi ile «Han-Cami» cemiyetiniñ azalarını qanunsız alda deñiştirdiler. Abdulganiyev Qırım musulmanları diniy idaresine boysunmaycağını ilân etip, Tavriya müftiyatına keçkenini bildirdi. «Han-Cami» cemiyetiniñ yañı erkânına habaşilerniñ tarafdarı olğan Qırım musulmanları Diniy merkeziniñ vekilleri kirdiler.
QMDİ qayd etti ki, «Tavriya müftiyatınıñ» temsilcileri «Han-Cami» cemiyetiniñ vesiqalarını ve müürini alıp, camide olğan paranı elde ettiler. Cemiyetniñ resmiy vekili Riza Abhairovnıñ aytqanına köre, seyfte 191 biñ ruble, tahminen 8 biñ Amerika dolları, 500 Türkiye lirası ve 45 euro bar edi.
