Qurultay keçirilmesiniñ sanını belgileycek Qırımtatar Milliy Meclisiniñ toplaşuv teşebbüsçileri temsil organnıñ azalarını sıqıştıralar, dep ayttı Qırımtatar Milliy Qurultayınıñ reisi, qırımtatar arketiniñ faali Zair Smedlâyev Qırım.Aqiqatqa.
«Meclis azalarına basqı yapıla, şu cümleden arbiylerniñ yardımı ile: şantaj, qorqutuv usulı ile – Meclis toplaşuvını keçirip, Qurultay sanını belgilemege zorlaycaq olalar», – dedi Smedlâyev ve olarğa «üç yol» berilgenini bildirdi.
«Birinci yol: siz reisiñiz (Qırımğa kirişi yasaq etilgen Meclis reisi Refat Çubarov – muar.) artından Qırımdan ketesiñiz. Ekinci yol: siz onıñ muavini Ahtem Çiygoznıñ artında ketesiñiz (mayıs 19-na qadar Aqmescit SİZOsında buluna – muar.), yani o qadar uzaq olmağan yerlerge. Ya da üçünci yol: İlyasovnı (Devlet şurası spikeriniñ muavini Remzi İlyasov – muar.) Meclis reisi olaraq tanıp, Aksenovnıñ lideri ile Aksenovnıñ Meclisini yapmaq», – dedi Smedlâyev.
Onıñ fikirince, İlyasov ve oña qoltutqanlarnıñ Mecliste olmayıp da, qırımtatar halqına yardım etmek imkânları bar.
«Olar Meclisni deñiştirip, soñra qırımtatar halqınıñ vaziyeti yahşı olğanını aytacaq olsalar, – bu bam-başqa mesele», – dedi Smedlâyev.
Yaqın vaqıtta Meclis toplaşuvı olacaqmı sualine Qurultay MSK reisi böyle cevap berdi: «Meclis toplaşuvınıñ sanını belgilemek içün olarnıñ kvorumı yoq».
Akimiyetniñ Krıminform saytı akimiyet vekilleri ve Qırımtatar Milliy Meclisi azalarınıñ körüşüvi aqqında bildirgen soñ Qırım Devlet Şurasınıñ spiker muavini Remzi İlyasov yaqın zamanda Qırımtatar Milliy Meclisi toplaşıp, Qurultay keçirilecek tarihını belgileycegini qayd ete.
Meclis reisiniñ muavini Nariman Celâl Qırım.Aqiqatqa vaziyetni izaatlap dedi ki, Qurultay çağırılması aqqında qarar Meclis toplaşuvında qabul etilmeli, lâkin şimdilik kvorum yoq.
