Aqyarnıñ şeer mahkemesi Rusiye Federatsiyasında, artıq ise işğal etilgen Qırımda da yasaq etilgen Hizb ut-Tahrir teşkilâtınıñ faaliyetinde iştirak etüvde şeklengen Aqyar sakini Nuri (Yuriy) Primorovnıñ apis cezası aqqında qararını lâğu etmedi, dep haber ete 15 minut saytı.
Qırım adliyecisi Emil Kürbedinov bildirdi ki, Aqyarnıñ şeer mahkemesi Nuri Primovnıñ apiske alınması aqqında qarar şikâyetini red etti. İmaye işbu qararğa lâğu instantsiyasında itiraz etmege istey.
Kürbedinov qayd etti ki, fevral 16-da aynı bu şekilde Ruslan Zeytullayevniñ şikâyeti red etildi. Mahkeme apiske alınğan şahıs ve imayecisi olmağanda keçirildi, böylece, adliyeciniñ aytqanına köre, «büyük hata yapıldı, çünki qabaatlanğan kişi mahkemede olmaq kerek».
Bu sefer, Kürbedinovnıñ aytqanına köre, mahkemede adliyeci oldı, lâkin Nuri Primovnı mahkemege ketirmediler.
Fevral 20-de Aqyarnıñ şeer mahkemesinde aynı iş boyunca qabaatlanğan Rustem Vaitovnıñ apiske alınmasına şikâyeti baqılmaq kerek.
Nuri Primov Ruslan Zeytullayev ve Rustem Vaitov ile beraber FSB hadimleri tarafından yanvar ayında yaqalanğan edi. Olarnı Rusiye Federatsiyası Cinaiy kodeksiniñ 205.5 maddesini bozğanında («Terroristik teşkilâtnıñ faaliyetini teşkil etüv ve bunıñ kibi bir teşkilâtta iştirak etüv») şeklene. Birinci instantsiya mahkemesi üçüni de 2 aylıq apis cezasına yaqaladı.
Kürbedinovnıñ malümatına köre, yaqalanğanlar Ukraina havfsızlıq hızmetiniñ nezareti altında bulunğan ediler, lâkin olarnıñ Hizb ut-Tahrir ile alâqası olğanını isbatlamadılar.
