Büyük Britaniya Mudafaa naziri Michael Fallon Rusiye Baltiya memleketleri içün havflı bir devlet olğanını tüşüne.
Fallon aytqanı kibi, Litvaniya, Latviya ve Estoniyada Rusiye prezidenti Vladimir Putin Qırım ve şarqiy Ukrainada qullanğan taktikasından fadalana bile.
Sierra Leone ziyareti vaqtında, fevral 18 künü, nazir «Putinden sebep qasevet etkenini» bildirdi.
O şunı qayd etti ki, NATO «Rusiye tarafından ola bilecek istilâğa» azır olmalı.
Fallon Rusiyeniñ Ukraina ziddiyetine alâqasını ve Britaniya ava boşluğında uçqan Rusiye arbiy uçaqlarını qayd etip keçti.
«Ukraina ile sıñırdan keçken tank ve zırhlı tehnika bar ve Rusiye qırıcıları La-Manşqa yaqlaşalar. Menimce, vaziyet kerginleşe», – dedi nazir.
Rusiye Ukraina şarqındaki ziddiyetke öz alâqasını tanımay. Ğarp ise buña inanmay ve Moskvağa qarşı Ukrainadaki areketleri içün cezalarnı kirsete.
